Montuojums
Type: proza
Comment: Maruta Laskovska czyta właśny tekst, opublikowany w Katoļu Dzeive 1989
Access: public
Phrases
| Orthographic | Translettering | Translation (PL) | Translation (EN) | Morphology | Phonetic | Comment |
|---|---|---|---|---|---|---|
| Nu sarunom ar babeņu Zuzanu Ornicāni, dzymušu Škaunes pogosta Ostrovsku sādžā. | ||||||
| Jaunū sīvu dzeds atvede uz sovom dzymtajom muojom – dzymtū sātu – Rēzeknis apriņka, Viļānu pogosta Ūgrinīkim. | ||||||
| Babenis dzeivē beja sovs laiks Dīvam, sovs dzīsmei, sovs dorbam. | ||||||
| Nu i dīneņa izadavuse itymā slapņajā vosorā, sauleite pa zemis viersu tai i staigoj. | ||||||
| A kaidys pupys myusu duorzā izaugušys! | ||||||
| Pi kotrys pupys pa treis žuburi, nu kotrys pupys treis rīkšovys pīgaidieju. | ||||||
| Zynu, zynu, Tu jau piec tūs dzīsmeišu atbrauci. | ||||||
| Paguojušajā godā pi mane jau beja vīna taida meitine, nu Reigys, nu augstys školys, klausejās, pīraksteja. | ||||||
| Es pīmiņu, jei staiguoja taiduos garuos, plotuos, plotuos biksēs. | ||||||
| Vot tev koč bruņceiši apvylkti, cīši eisi gon i šauri, nu vys jau piec sīvīšu cylvāka izaver. | ||||||
| A myusu kaimiņu Ontužānu jaunuokais dāls ni druskys nasmuodeja, ka tai meitinei tuos garuos, plotuos biksis, skrēja jai pakaļ obi ar sovu motocikletu kai nagudri, a kaimiņš guoja da manis i žāluojuos, ka tuo jaunuokuo navar ni savaļdeit, ni pīvaļdeit. | ||||||
| Taidi jau ir tī jaunī godi, ni tī kū savaļdeisi, ni tī kū pīvaļdeisi. | ||||||
| Tu tagad verīs iz mane i dūmoj: taida vaca taņteņa, daudz vacu dzīsmeišu zyna. | ||||||
| Zynu, meit, zynu. | ||||||
| Na vīns viņ jaunais puors myužā satykts, na vīns viņ pavadeits, tikai maņ pošai nasaticīs, ka es jau taida vaca. | ||||||
| Cik ta seņ beja tī agrī svātdīņu reiti, kod guojom ar muoseņu iz Landskoronys bazneicu, guojom bosom kuojom, deļ tuo ka kūrpis beja vīneiguos i vajadzēja taupēt, i tikai pi pošu bazneicys durovu varēja apviļkt kuojuos. | ||||||
| A deļ tuo vokorā beja daņči foļvorkys cīmata bierztaleņā, i ka Dīvs mani par doncuošonu struopātu, tod es sovu grāku navarātu ni pīlyugt, ni puorlyugt. | ||||||
| I cik ta seņ es varēju saceit: | ||||||
| Muns mīlais maņ sūlej nu dabasu zvaigznis | ||||||
| I vuorpeņu leigovys kleitai- | ||||||
| Jam sūļeju velneņu dieleņu vīta, | ||||||
| Nu bryuna i skaneiga muola. | ||||||
| A bierneiba muna bez tylta, bez laipu, | ||||||
| Pa vacū meža ceļu pi babenis skrīn. | ||||||
| Na tikai piec gluosta i syltuma, | ||||||
| Jei steidzās piec dzīsmeitis tuos – | ||||||
| Par boltū puči azarā... | ||||||
| A cik ta seņ muna mozuo muoseņa, tod jau jei vēļ zam golda staiguoja, iz muna brašuo Pītera verūtīs, pavysam nūpītnai breinuojuos: | ||||||
| O je, kaidys onkulam lelys, dzaltonys ūsys! – | ||||||
| Jaunai nikas nabeja par gryutu. | ||||||
| Pa soltuma pīrautu pluona lada kuorteņu pūrā bez apavim dzērvinis lasieju, taidys kuorklu myzu nostys iz sātu nešu, ka šudiņ pošai nav ticeibys, ka es tū byutu varējuse dareit. | ||||||
| Vacuokuo meita tai gribēja muoceitīs, aizvežu iz Varakļuonu gimnazeju, a muns Pīters sajiudze zyrgu i ar vuordim: | ||||||
| „A kur ta mes, buobeņ, jimsim školys naudu?” brauce meitai pakaļ. | ||||||
| Tūreiz gon sirds bezspēceibā cīši sopēja. | ||||||
| A godi aizskrīn. | ||||||
| Garum Ūgrinīkim, Maltys, Spiergys upeitem, pa skaneigū Laksteigolys saleņu, i tu, ciļvieceņ, nazini, kur jī palīk. | ||||||
| Tu namoni tuo breiža, ka rūkys vairuok nagrib klauseit kai seņuok, a kuojis par poļkys sūlim naguodoj. | ||||||
| Vyss mainuos. | ||||||
| Redzi, meit, muns vacais Pīters jau nu poša reita sēd tī pi lūga iz sūleņa i gaida, kod postnīks jam avīzis atness, a cik ta seņ mes obi ar jū bazneicys gruomotā skaitejom, tagad, padūmoj – lels kungs, avīzis škurynoj. | ||||||
| A tymuos avīzēs sludynuojumu bez sova gola. | ||||||
| Vot tī i rūnās tī aicynuojumi. | ||||||
| Unučkeņai aicynuojums iz teijātera spieleišonu. | ||||||
| Unuks gribūt byut par dzejnīku. | ||||||
| Kas jim par myusu tukšajom ustobom i naravātūs runkuļu vogom. | ||||||
| Tai i aizīt piec aicynuojuma. | ||||||
| Gaidi, kod atsagrīzs, gaidi kaidi atsagrīzs i gaidi voi atsagrīzs... | ||||||
| A par tom dzīsmeitem es tev, meit, gribieju saceit: | ||||||
| nav jau aiz kolnu tī laiki, ka gruomotu vyspuor nabeja, vāluok pasaruodeja pa kaidai, gadējēs, pītryuka santima par kū juos nūpierkt, a deļ tuo dzīsmeitis vysod leidzē meitinis, puiškinus izaudzynuot. | ||||||
| I beja myusim taids dzīsminīks, par Jūrdžu Andrivu sauce. | ||||||
| Sovys dzīsmis iz bārza tuoss, ar ūgli jis raksteja. | ||||||
| A skola guņs cīši acs maitoj, dreiži oklys palyka. | ||||||
| Tikai nu dzīsmis jis nikod nasaškeire. | ||||||
| Dzīsme jau ir kai breinuma putnys. | ||||||
| Ka ļauds jū suoks aizmierst, nūšveikstynuos ar spuornim i prūjom byus. | ||||||
| Deļ tuo zini, meit: | ||||||
| Kū dzīduosi, kū runuosi, | ||||||
| Cytu pusi staiguodama, | ||||||
| Dzīdi poša sovys dzīsmis, | ||||||
| Runoj sovu volūdeņu... | ||||||
| Kas nu dzērves garuo kokla, | ||||||
| Ka zeileišu nanosoj. | ||||||
| Kas nu meitys smuidrys, garys | ||||||
| Ka dzīsmeņu nazynoj. | ||||||
| I pīmini, meit: acs - rūkys myusim deļ dorba, acs deļ laimis, lai aiz sovys sātys vuorteņu pasauli īraudzeitu. |
Text Sources
| Name | Type | File Name | Author | Year | Title | Other | Description |
|---|---|---|---|---|---|---|---|
| Ltg_2012_red_MaLa_Montuojums | nagranie | Ltg_2012_red_MaLa_Montuojums.mp3 | Nicole Nau | 2012 | Montuojums | Maruta Laskovska czyta własny tekst, opublikowany w Katoļu Dzeive 1989 |